فلسفتى عن الحب

الحب دا عامل زى بيت كبير أوى وله أبواب كتير أى وكل باب له مفتاح إلا باب واحد ملوش مفتاح الباب ده اللى يقدر يعمل مفتاحه بنفسه هو دا اللى بيحب بجد ومخلص بجد لأنه تعب عشان يعمل المفتاح ده على عكس ناس تانية تاخد المفتاح جاهز .. هيا أصلا مكنش غرضها تدخل عشان بتحب .. ممكن يكون زاير ممكن يكون خداع ممكن يكون أى حاجة تانية واللى تعب عشان يعمل المفتاح ده بنفسه عمره ما حيفرط فيه لحظة من اللحظات وده علشان اللى بيتعب فى حاجة عمر الحاجة دى ما تروح منه بسهولة والعكس برضو ولو المفتاح صدى إعرف إن المفتاح دا مش أصلى مفتاح تايوانى صاحبه كان برضه غشاش وخداع فتح وخد اللى كان محتاجه وبعد كدا رمى المفتاح لأنه مكنش محتاج غير الحاجة اللى خدها وبعد ما خدها خلاص حيعوز منها ايه تانى كان لازم يرمى المفتاح وكمان لو قدر يكسر الباب حيكسره بس الباب الحقيقى عمره ما ينكسر ممكن ينخدش بنجرح بس مسيره حيلاقى اللى يداوى جرحه لأنه يستاهل بجد إنه يتدواى أكيد أكيد لأنه عملة نادرة فى زمن مليان أبواب تعبانة وده خير أصلا إن لو لقيت بيت له باب ده أكتر حاجة دلوقت إنك تلاقى بيت من غير أبواب أى حد يدخل ويخرج أصل الحكاية سايبة وطبعا البيت زواره كتير (العدد فى الليمون) ما هى بوظة ... المهم فى النهاية إنك تقدر تحافظ على بابك وتحميه من أى لص أو غشاش أو منافق أو حتى معجب أقولك ليه أصل مش أى معجب بيعرف قيمة الباب دا ممكن يكون معجب لأنه مشفش الحاجة دى قبل كدا وممكن يكون كان بيقول إنه مستحيل إنه يلاقى بيت زى دا أكيد هوا ساكن أصلا فى مكان مفيهوش بيت زى البيت دا وبعدين برضو خلى بالك إن الفقر مش مكتوب طول العمر على الناس الفقرا ايه المانع ان واحد فقير كان عايش فى حى فقرا بس كان حلمه إنه يسكن فى قصر مش معنى إنه عايش مع الفقرا إنه يبقى زيهم فى كل حاجة أكيد لازم ينبهر من أول قصر يقابله بس أنا بقوله إنك لو دورت بجد حتلاقى قصور أحسن من دى كتير بس انت وشطارتك على قد ما كنت صادق النية على قد ما حتتعب مرتين الأولى منهم لما تتعب فى اللف والدوارن لحد ما تلاقى القصر الكبير الجميل اللى هو بالنسبة ليك أحسن حاجة والمرة التانية لنا تتعب عشان تدخل القصر دا لازم تعمل مفتاح بنفسك ومفتاح أصلى ... وبفكرك إن الحاجة السهلة دايما بتروح بسهولة واللى ميتعلمش من غلطه يبقى ميستاهلش إنه يعيش فى قصر ويريح نفسه كمان لأن القصر ده مش أى حد بيدخله وفى النهاية عاوز أقول إنك متزعلش لو كان نصيبك إنك تعيش فى قصر بابه مخدوش أو مجروح وبلاش يغرك شكل القصر الخارجى المهم من جوا عامل ازاى ولو عجبك القصر من جوا صلح الباب ورجعه زى ما كان وأحسن .. كمان المهم إنك على قد ما كنت مخلص النية جاد فى إرادتك ومنتش متسرع إعرف إنك أكيد أكيد لازم توصل وتسمى القصر دا باسمك طول العمر ومحدش يقدر ياخده منك طول ماانت بتراعيه فى كل وقت وبتصونه وتخلى بالك منه ولو حصل إنك لا مؤاخذة يعنى انطردت م القصر فاعرف إنك هملت القصر وانت بايدك اللى ضيعته منك ومش أى بيت بفكرك يتكتب عليه قصر يبقى قصر خلى بالك خلى بالك خلى بالك

20/11/2007

تأليف / تامر الشاعر